Google Payments-ի գաղտնիության ծանուցագիր

Վերջին փոփոխությունը՝ 2024 թ․ նոյեմբերի 18

Google-ի գաղտնիության քաղաքականությունը նկարագրում է, թե ինչպես ենք մենք վարվում անձնական տեղեկությունների հետ, երբ դուք օգտագործում եք Google-ի պրոդուկտներն ու ծառայությունները։ Եթե դուք 18 տարեկանից փոքր եք, ապա ձեզ համար նախատեսված լրացուցիչ ռեսուրսներին կարող եք ծանոթանալ Google-ի՝ դեռահասների համար գաղտնիության ուղեցույցում։

Google Payments ծառայությունը առաջարկվում է Google հաշվետերերին, և ձեր կողմից դրա օգտագործումը կարգավորվում է Google-ի գաղտնիության քաղաքականության դրույթներով։ Բացի այդ՝ այս Գաղտնիության ծանուցագիրը նկարագրում է Google-ի գաղտնիության քաղաքականության դրույթները, որոնք ծագում են Google Payments-ի օգտագործման ընթացքում։

Google Payments-ի ձեր կողմից օգտագործումը կառավարվում է Google Payments-ի օգտագործման պայմաններով, որտեղ մանրամասն նկարագրվում են այս Գաղտնիության ծանուցագրով կարգավորվող ծառայությունները։ Մեծատառերով գրված եզրույթները, որոնք սահմանված չեն Google Payments-ի այս Գաղտնիության ծանուցագրում, բացատրվում են Google Payments-ի օգտագործման պայմաններում։

Google Payments-ի գաղտնիության ծանուցագիրը կիրառվում է Google LLC-ի և ամբողջությամբ նրան պատկանող դուստր ընկերությունների (այդ թվում՝ Google Payment Corp.-ի («GPC»)) կողմից առաջարկվող ծառայությունների նկատմամբ։ Ծանոթացեք ծառայության շրջանակում ձեզ հասանելի Google Payments-ի օգտագործման պայմաններին՝ իմանալու, թե որ դուստր ընկերությունն է առաջարկում ծառայությունը։

Բրազիլիայում բնակվող օգտատերերի տվյալների վերահսկիչը, որը պատասխանատու է նրանց տեղեկությունների համար, Google LLC-ն է և Բրազիլիայի օրենքով սահմանված դեպքերում՝ Google Brasil Pagamentos Ltda-ն։
Եվրոպական տնտեսական տարածքում (բացի ՄԹ-ից) բնակվող օգտատերերի (բացառությամբ Google-ի առևտրային հարթակներից օգտվող վաճառողների) տվյալների վերահսկիչը, որը պատասխանատվություն է կրում նրանց տեղեկությունների համար, Google Ireland Limited-ն է։
Եվրոպական տնտեսական տարածքում (բացի ՄԹ-ից) բնակվող և Google-ի առևտրային հարթակներում վաճառող օգտատերերի տվյալների վերահսկիչը, որը պատասխանատվություն է կրում նրանց տեղեկությունների համար, Google Payment Ireland Limited-ն է։
ՄԹ-ում բնակվող օգտատերերի (բացառությամբ Google-ի առևտրային հարթակներից օգտվող վաճառողների) տվյալների վերահսկիչը, որը պատասխանատվություն է կրում նրանց տեղեկությունների համար, Google LLC-ն է։
ՄԹ-ում բնակվող և Google-ի առևտրային հարթակներում վաճառող օգտատերերի տվյալների վերահսկիչը, որը պատասխանատվություն է կրում նրանց տեղեկությունների համար, Google Payment Limited-ն է։

Տեղեկություններ, որոնք մենք հավաքում ենք

Ի լրումն Google-ի գաղտնիության քաղաքականության մեջ նշված տեղեկությունների՝ մենք նաև կարող ենք հավաքել հետևյալ տվյալները․

Գրանցման ժամանակ տրամադրած տեղեկություններ

Google Payments-ում գրանցվելիս դուք ստեղծում եք Google վճարային պրոֆիլ, որը կապված է ձեր Google հաշվի հետ։ Կախված Google Payments-ի ծառայություններից, որոնք դուք օգտագործում եք, և ի լրումն Google-ի գաղտնիության քաղաքականության մեջ նշված տեղեկությունների՝ մենք կարող եք խնդրել ձեզ տրամադրել հետևյալ տվյալները՝

վարկային կամ դեբետային քարտի համարը և քարտի վավերականության ժամկետը,
բանկային հաշվի համարն ու վավերականության ժամկետը,
հասցեն,
հեռախոսահամարը,
ծննդյան ամսաթիվը,
սոցիալական ապահովության համարը կամ հարկ վճարողի նույնականացման համարը (կամ անձը հաստատող պաշտոնական այլ փաստաթղթերի համարները),
վաճառողների և մասնավորապես ընկերությունների դեպքում՝ ձեր ընկերության կատեգորիան և որոշակի տեղեկություններ ձեր վաճառքի և գործարքների ծավալի մասին։

Որոշ դեպքերում մենք նաև կարող ենք խնդրել ձեզ ուղարկել լրացուցիչ տեղեկություններ կամ պատասխանել լրացուցիչ հարցերի, որոնք կօգնեն հաստատել ձեր տվյալները կամ ինքնությունը։ Եթե դուք կապի օպերատորի վճարային օգտահաշիվ գրանցեք, մենք կխնդրենք ձեզ տրամադրել որոշակի տեղեկություններ բջջային հեռախոսի հաշվի մասին։

Գրանցման ժամանակ նշվող ձեր տեղեկությունները պահվում են ձեր Google հաշվի հետ միասին, իսկ վճարման եղանակի գրանցման մասին տվյալները՝ Google-ի սերվերներում։ Որոշակի տվյալներ կարող են նաև պահվել ձեր շարժական սարքում։

Տեղեկություններ, որոնք ստացվում են կողմնակի ռեսուրսներից

Մենք կարող ենք ձեր մասին տեղեկություններ ստանալ երրորդ կողմերից, այդ թվում՝ հաստատման կողմնակի ծառայություններից։ Այդ տվյալները կարող են ներառել՝

տվյալներ վաճառողի տարածքում կատարված Google Payments գործարքների մասին,
տեղեկություններ, որոնք առնչվում են ձեր կողմից վճարման եղանակների օգտագործմանը և ձեր հաշիվներին՝ Google Payments-ի հետ կապված կողմնակի ծառայություններում,
ձեր քարտը թողարկողի կամ ֆինանսական հաստատության ինքնությունը,
գործառույթների և առավելությունների հետ կապված տեղեկություններ, որոնք կապված են ձեր վճարման եղանակի հետ,
տեղեկություններ, որոնք վերաբերում են ձեր Google վճարային պրոֆիլում պահվող միջոցների հասանելիությանը,
տվյալներ՝ ստացված կապի օպերատորից կամ վերջինիս հետ կապված վճարումների մասին,
հաճախորդների հաշվետվություններ ԱՄՆ-ի «Վարկային տեղեկությունների բարեխիղճ տրամադրման մասին» օրենքով սահմանված՝ «օգտատերերի հաշվետվություններ» եզրույթի իմաստով,
երրորդ կողմերի (օրինակ՝ վաճառողների և վճարային ծառայություններ մատուցողների) հետ կատարված գործարքների մասին տեղեկություններ, որոնք կօգտագործվեն խարդախության ռիսկերի մոդելավորման համար, որպեսզի տրամադրենք խարդախության ռիսկերի ցուցանիշներ և խարդախությունը կանխելու ծառայություններ երրորդ կողմերին։

Բացի այդ՝ եթե դուք վաճառող եք, մենք կարող ենք տեղեկություններ ստանալ ձեր և ձեր ընկերության մասին վարկային պատմությունների բյուրոյից կամ ընկերությունների մասին տեղեկություններ տրամադրող ծառայությունից։

Գործարքի մասին տեղեկությունները

Երբ դուք օգտագործում եք Google Payments-ը գործարք կատարելու համար, մենք կարող ենք տեղեկություններ հավաքել գործարքի մասին, այդ թվում՝

գործարքի ամսաթիվը և գումարը,
վաճառողի գտնվելու վայրն ու նկարագրությունը,
վաճառողից գնված ապրանքի կամ ծառայության նկարագրությունը,
ցանկացած լուսանկար, որը դուք որոշեք կցել գործարքին,
վաճառողի և գնորդի (կամ ուղարկողի և ստացողի) անուններն ու էլ․ հասցեները,
վճարման օգտագործված եղանակը,
գործարքի նպատակի ձեր նկարագրությունը և, առկայության դեպքում, գործարքին առնչվող առաջարկը։

Ինչպես ենք մենք օգտագործում հավաքված տեղեկությունները

Ի լրումն Google-ի գաղտնիության քաղաքականության մեջ նկարագրված օգտագործման ձևերի՝ մենք օգտագործում ենք ձեր տեղեկությունները, որոնք դուք տրամադրում եք մեզ, Google Payment Corp.-ին (GPC) կամ մեր դուստր ընկերություններից որևէ մեկին, և որոնք մենք ստանում ենք երրորդ կողմերից, որպեսզի կարողանանք՝

տրամադրել ձեզ Google Payments-ը՝ հաճախորդներին սպասարկելու նպատակով,
պաշտպանել Google-ի, մեր օգտատերերի և հանրության իրավունքները, սեփականությունն ու անվտանգությունը, ինչպես նաև կանխել խարդախությունը, ֆիշինգն ու այլ հակաիրավական գործողություններ,
օգնել երրորդ կողմերին տրամադրել ձեզ անհրաժեշտ ապրանքները կամ ծառայությունները,
ստուգել ձեր Google վճարային պրոֆիլը՝ համոզվելու, որ դուք պահպանում եք հաշվի օգտագործման պայմանները,
կայացնել որոշումներ՝ կապված Google Payments-ում ձեր ապագա գործարքների հետ,
ստեղծել և մշակել խարդախության ռիսկերի մոդելներ ձեր պատմության և ընթացիկ տեղեկությունների հիման վրա, թողարկել խարդախության ռիսկերի ցուցանիշներ և գնահատականներ, որոնք փոխանցվում են երրորդ կողմերին բացառապես խարդախությունները և չարաշահումները կանխելու նպատակով,
տրամադրել ձեզ տեղեկություններ ձեր վճարման եղանակի գործառույթների և առավելությունների մասին, ինչն օգնում է ավելի լավ նույնականացնել ձեր վճարման եղանակը, երբ օգտագործում եք Google Payments-ը,
բավարարել այլ հիմնավորված բիզնես կարիքներ, որոնք առնչվում են Google Payments-ում ձեր կատարած գործարքներին։

Մենք կարող ենք պահել ձեր տրամադրած տեղեկությունները այնքան ժամանակ, քանի դեռ օգտագործում եք Google Payments-ը, և երբեմն երկարացնել պահման ժամկետը, եթե դա բխում է իրավական և կարգավորող մարմինների հանդեպ մեր պարտավորություններից։

Տեղեկություններ, որոնք մենք փոխանցում ենք

Մենք կփոխանցենք ձեր անձնական տեղեկությունները Google-ից դուրս այլ ընկերությունների և անձանց միայն հետևյալ հանգամանքներում.

ինչպես սահմանված է Google-ի գաղտնիության քաղաքականության մեջ․
ինչպես սահմանված է օրենքով․
եթե դա անհրաժեշտ է ձեր գործարքի մշակման կամ հաշվի սպասարկման համար, այդ թվում՝ ձեր հաշվի անվտանգության ապահովումը բարելավելու և այն խարդախությունից պաշտպանելու և ամենօրյա այլ բիզնես նպատակներով․
կողմնակի ծառայությունում ձեր գրանցումն ավարտելու համար․
եթե անհրաժեշտ է տեղեկացնել կողմնակի վաճառողին, ում կայքը կամ հավելվածը դուք այցելում եք, թե արդյոք ունեք Google վճարային պրոֆիլ, որը կարելի է օգտագործել այդ վաճառողի կայքի կամ հավելվածի միջոցով վճարում կատարելու համար։ Դուք կարող եք անջատել այս կարգավորումը․
խարդախության ռիսկերի ցուցանիշներ և գնահատականներ երրորդ կողմերին փոխանցելու համար, որոնք օգտագործում են Google-ի ռիսկերի ցուցանիշներն ու խարդախության կանխման ծառայությունները, որպեսզի պաշտպանեն երրորդ կողմերի հետ ձեր գործարքները խարդախությունից և չարաշահումներից․
մենք կարող ենք փոխանցել ձեր անձնական տեղեկությունները ձեր վճարման եղանակի թողարկողին, վճարային ցանցին, մշակողներին և դրանց գործընկերներին, որպեսզի համոզվենք, որ ձեր վճարային եղանակն անվտանգ է և վավեր, և տրամադրենք ձեր վճարման եղանակի գործառույթների և առավելությունների մասին համապատասխան տեղեկություններ։

Օրինակներ, երբ տեղեկությունները կարող են փոխանցվել

Երբ դուք գնում կամ գործարք եք կատարում Google Payments-ի միջոցով, մենք որոշակի անձնական տեղեկություններ հասանելի ենք դարձնում ընկերությանը կամ անձին, ումից դուք որևէ բան եք գնում կամ ում հետ գործարք եք կատարում։ Դա ներառում է ձեր անձնական տեղեկությունների փոխանցումը մշակողին, ումից դուք Google Payments-ի միջոցով գնումներ եք կատարում Google Play-ում։
Երբ կայքում կամ հավելվածում գնում եք կատարում Google Pay-ի միջոցով, մենք կարող ենք փոխանցել ձեր փոստային դասիչը կամ փոստային կոդը և ձեր վճարման եղանակի մասին տեղեկությունները, որպեսզի վաճառողը կարողանա հաշվարկել հարկերը, առաքման գումարը և այլ մանրամասներ, որոնք կապված են ձեր պատվերի գնի հետ (օրինակ՝ առաքման գինը և այլ տեղեկություններ), և որոշել, թե արդյոք վաճառողը կարող է ընդունել վճարման այդ եղանակը ձեզանից, ինչպես նաև կիրառել արտոնություններ կամ սահմանափակումներ ձեր գնման համար վճարման որոշակի եղանակների նկատմամբ։
Երբ դուք երրորդ կողմի վճարման եղանակ եք ավելացնում ձեր Google վճարային պրոֆիլում, մենք կարող ենք կողմնակի վճարային ծառայություններ մատուցողի հետ փոխանակել ձեր մասին որոշակի անձնական տեղեկություններ, որպեսզի երկուսս էլ կարողանանք համապատասխան ծառայությունը տրամադրել ձեզ։ Տեղեկությունները կարող են ներառել ձեր անունը, պրոֆիլի նկարը, էլ․ հասցեն, Internet Protocol-ի (IP) հասցեն, վճարային հասցեն, հեռախոսահամարը, սարքի մասին տեղեկությունները, տեղադրությունը և Google հաշվից կատարած գործողությունների մասին տեղեկությունները։
Երբ դուք այցելում եք մասնակից վաճառողի կայքը կամ հավելվածը, նա կարող է ստուգել՝ արդյոք դուք ունեք Google վճարային պրոֆիլ և վճարման աջակցվող եղանակ, որը կարելի է օգտագործել նրա կայքի կամ հավելվածի միջոցով գնում կատարելու համար։ Դա հարկավոր է՝ կայքերում և հավելվածներում ձեզ անհասանելի գործառույթների ցուցադրման հավանականությունը նվազագույնի հասցնելու համար։
Երբ գործարք եք անում երրորդ կողմի (օրինակ՝ վաճառողների կամ վճարային ծառայություններ մատուցողների) հետ, մենք կարող ենք ուղարկել խարդախության ռիսկերի ցուցանիշները և ձեր վճարման գործարքին առնչվող խարդախության գնահատականները այդ երրորդ կողմերին բացառապես խարդախությունները և չարաշահումները կանխելու նպատակով։

Տեղեկությունները, որոնք մենք հավաքում ենք, այդ թվում՝ երրորդ կողմերից ստացվածները, կարող են փոխանցվել մեզ հետ փոխկապակցված ընկերությունների, այսինքն՝ այլ ընկերությունների, որոնք պատկանում են Google LLC-ին կամ կառավարվում են վերջինիս կողմից։ Մեզ հետ փոխկապակցված ընկերությունները, որոնք կարող են լինել ֆինանսական կամ ոչ ֆինանսական հաստատություններ, կօգտագործեն նման տեղեկություններն իրենց ամենօրյա աշխատանքային նպատակների համար, ինչպես նկարագրված է այս Գաղտնիության ծանուցագրում և Google-ի գաղտնիության քաղաքականության մեջ։

Մենք ձեզ իրավունք ենք տալիս արգելելու GPC-ի և փոխկապակցված ընկերությունների (եթե առկա են) միջև որոշակի տեղեկությունների փոխանակումը։ Մասնավորապես, դուք կարող եք արգելել, որ՝

մենք ձեր վարկունակության մասին տեղեկությունները փոխանցենք GPC-ին և փոխկապակցված ընկերություններին իրենց ամենօրյա աշխատանքային նպատակների համար, և/կամ
մեզ հետ փոխկապակցված ընկերությունները գովազդեն ձեզ իրենց ապրանքները կամ ծառայությունները՝ հիմնվելով ձեր անձնական տեղեկությունների վրա, որոնք մենք հավաքում և փոխանցում ենք նրանց։ Այս տեղեկությունները ներառում են մեր ծառայություններում օգտագործվող ձեր հաշվի պատմությունը։

Դուք նաև կարող եք արգելել, որ Google LLC-ն և փոխկապակցված ընկերությունները տեղեկացնեն կողմնակի վաճառողին, ում կայքը կամ հավելվածը դուք այցելում եք, թե արդյոք ունեք Google վճարային պրոֆիլ, որը կարելի է օգտագործել վաճառողի կայքի կամ հավելվածի միջոցով գնումներ կատարելու համար։

Եթե որոշեք արգելել դա, ձեր որոշումը ուժի մեջ կլինի, մինչև որ չհայտնեք մեզ, որ չեղարկում եք այն։

Եթե չեք ուզում, որ մենք GPC-ին և նրա հետ փոխկապակցված անձանց փոխանցենք մեր կողմից հավաքված ձեր վարկունակության վերաբերյալ անձնական տեղեկությունները, որոնք նրանք կօգտագործեն ձեզ գովազդ ցուցադրելու համար, կամ եթե չեք ուզում, որ Google LLC-ն և նրա հետ փոխկապակցված անձինք տեղեկացնեն կողմնակի վաճառողին, ում կայքը կամ հավելվածը դուք այցելում եք, թե արդյոք ունեք Google վճարային պրոֆիլ, խնդրում ենք ձեզ նշել այդ մասին՝ մուտք գործելով հաշիվ և փոփոխելով ձեր ընտրանքները Google Payments-ի գաղտնիության կարգավորումներում։

Մենք ոչ ոքի չենք փոխանցի ձեր անձնական տեղեկությունները GPC-ից կամ փոխկապակցված ընկերություններից դուրս՝ բացառությամբ այն դեպքերի, որոնք նկարագրված են այս Գաղտնիության ծանուցագրի կամ Google-ի գաղտնիության քաղաքականության մեջ։ Google Payments-ը պրոդուկտ է, որն առաջարկվում է Google հաշվետերերին։ Տվյալները, որոնք դուք տրամադրում եք Google LLC-ին՝ Google հաշիվ գրանցելու նպատակով, չեն կարգավորվում այս Գաղտնիության ծանուցագրի՝ տվյալների օգտագործումն արգելող դրույթներով։

Ձեր տեղեկությունների անվտանգության ապահովումը

Անվտանգության ապահովման մեր քաղաքականության մասին ավելին իմանալու համար ծանոթացեք Google-ի գաղտնիության քաղաքականության հիմնական տարբերակին։

Ձեր Google վճարային պրոֆիլի անվտանգությունը կախված է նրանից, թե արդյոք գաղտնի եք պահում Ծառայության ձեր հաշիվների գաղտնաբառերը, PIN կոդերը և մուտքի մյուս տվյալները։

Եթե դուք ձեր Google հաշվի տեղեկությունները փոխանցեք երրորդ կողմի, նրան հասանելի կլինեն ձեր Google վճարային պրոֆիլը և անձնական տեղեկությունները։
Դուք պատասխանատվություն եք կրում ձեր շարժական սարքի և ձեր սարքում Google Payments հավելվածի հասանելիությունը կառավարելու, այդ թվում՝ ձեր գաղտնաբառ(եր)ը և/կամ PIN կոդը գաղտնի պահելու և այլ անձանց չփոխանցելու համար։
Դուք նաև պարտավոր եք զգուշացնել Google-ին և համապատասխան գործընկերոջը, եթե կարծում եք, որ Google Payments հավելվածում տեղեկությունների պաշտպանությունը վտանգված է։

Ցանկացած տեղեկություն, որն անմիջականորեն տրամադրում եք կողմնակի վաճառողի, կայքի կամ հավելվածի, չի կարգավորվում այս Գաղտնիության ծանուցագրով։ Մենք պատասխանատվություն չենք կրում վաճառողների կամ այլ երրորդ կողմերի գաղտնիության ու անվտանգության ապահովման գործելակերպերի համար, որոնց դուք ուղղակիորեն կփոխանցեք ձեր անձնական տեղեկությունները։ Եթե որոշում եք ձեր անձնական տեղեկությունները փոխանցել անմիջականորեն որևէ երրորդ կողմի, ապա մենք խրախուսում ենք ձեզ ծանոթանալ այդ կողմի գաղտնիության քաղաքականությանը։